വിവാഹേതര ലൈംഗികബന്ധം ക്രിമിനല് കുറ്റമല്ല- സുപ്രീം കോടതി
വിവാഹേതര ലൈംഗികബന്ധം ക്രിമിനല് കുറ്റമല്ലെന്ന് സുപ്രീം കോടതി. സ്ത്രീകളെ അന്തസ്സില്ലാതെ കാണുന്നതാണ് ഇന്ത്യന് ശിക്ഷാ നിയമത്തിലെ 497-ാം വകുപ്പെന്ന് കോടതി നിരീക്ഷിച്ചു. ചീഫ് ജസ്റ്റിസ് ദീപക് മിശ്ര അധ്യക്ഷനായ ഭരണഘടനാ ബെഞ്ചിന്റേതാണ് വിധി. ജസ്റ്റിസ് നരിമാനാണ് വിധിപ്രസ്താവം നടത്തിയത്.
വിവാഹേതര ലൈംഗികബന്ധത്തില് പുരുഷന്മാരെമാത്രം കുറ്റക്കാരാക്കുന്ന 497-ാം വകുപ്പ് റദ്ദാക്കണമെന്നാവശ്യപ്പെട്ട് സുപ്രീംകോടതിയില് സമര്പ്പിക്കപ്പെട്ട ഹര്ജിയിലാണ് വിധിയുണ്ടായിരിക്കുന്നത്. വിവാഹമോചനത്തിന് വിവേഹേതര ലൈംഗികബന്ധം കാരണമാകാം. എന്നാല് അതൊരു ക്രിമിനല് കുറ്റമല്ല. സമൂഹത്തിന്റെ താല്പര്യത്തിനനുസരിച്ച് ചിന്തിക്കണമെന്നും ജീവിക്കണമെന്നും സ്ത്രീയോട് ആവശ്യപ്പെടാനാവില്ല. സ്ത്രീ ഭര്ത്താവിന്റെ സ്വത്തല്ലെന്നും കോടതി വ്യക്തമാക്കി.
ഹര്ജിയെ കേന്ദ്രസര്ക്കാര് എതിര്ത്തിരുന്നു. സ്ത്രീകളെക്കൂടി കുറ്റവാളിയാക്കണം എന്ന നിലപാടാണ് കേന്ദ്രം സ്വീകരിച്ചത്.
No comments